ក្រុង Lampung៖ ជាការបើកទំព័រថ្មីលើកិច្ចសហការលើកកំពស់ធនធានមនុស្សដល់ប្រទេសសមាជិក សមាគមសម្ព័ន្ធបញ្ញវន្តមុស្លិមអាស៊ីអាគ្នេយ៍ (ICMA) សមាគមបញ្ញវន្តមុស្លិមឥណ្ឌូណេស៊ី (ICMI) ទទួលបានការជ្រោមជ្រែងពី ក្រុុងLampung កោះស៊ូម៉ាត្រា នឹងបើកទូលាយផ្តល់អាហារូបករណ៍ជាច្រើនកន្លែងដល់ប្រទេសជាសមាជិក ICMA រួមមានកម្ពុជា និង ប្រទេសចំនួន១០ផ្សេងទៀតក្នុងតំបន់អាស៊ីអាគ្នេយ៍ សម្រាប់ការសិក្សាថ្នាក់ឧត្តមសិក្សានៅទីក្រុងកោះនេះ ដែលមានសាកលវិទ្យាល័យរដ្ឋ៨ និងឯកជនសរុបដល់ទៅ ១១៦។
នេះបើយោងតាមការបញ្ជាក់របស់ ឯកឧត្តម ណុះ ស្លេះ រដ្ឋលេខាធិការក្រសួងអប់រំ យុវជន និងកីឡា ដែលទទួលបន្ទុកកិច្ចការអប់រំ និងអភិវឌ្ឍន៍ធនធានមនុស្ស នៃសមាគមសហភាពបញ្ញវន្តមុស្លិមកម្ពុជា កាលពីថ្ងៃទី០៩ ខែធ្នូ ឆ្នាំ២០១៨។ ឯកឧត្តមបន្តថា យើងនឹងបន្តការទំនាក់ទំនងលម្អិតបន្ថែមទៀតជាមួយ ICMI ដើម្បីទទួលបានកូតាអាហារូបករណ៍ក្នុងចំនួនណាមួយច្បាស់លាស់ និងជំនាញអាទិភាពដែលតម្រូវការចាំបាច់សម្រាប់កម្ពុជាក្នុងការចូលរួមអភិវឌ្ឍន៍ប្រទេស។
ឯកឧត្តមទេសរដ្ឋមន្ត្រី អូស្មាន ហាស្សាន់ បានថ្លែងការកោតសរសើរដល់ភាគីម្ចាស់ផ្ទះ ICMI ចំពោះការផ្តួចផ្តើមអោយកកើតចេញជារូបរាង ICMA សំដៅពង្រឹងកិច្ចសហប្រតិបត្តិការរវាងបណ្តុំបញ្ញវន្តក្នុងប្រទេសអាស៊ីអាគ្នេយ៍ ឆ្ពោះទៅរកការអភិវឌ្ឍចំណេះដឹង ជំនាញ ជាពិសេសផ្តល់ឱកាសដល់ប្រទេសសមាជិក បានទាញយកផលប្រយោជន៍ទ្រទ្រង់វិស័យផ្សេងៗ ដែលចាំបាច់ ដើម្បីរួមចំណែកក្នុងការអភិវឌ្ឍន៍ប្រទេសជាតិ។ តបទៅនឹងការបើកទំព័រថ្មី លើករណីផ្តល់អាហាររូបករណ៍ពីរដ្ឋាភិបាល ក្រុង Lampung មកកាន់ប្រទេសសមាជិកICMA ឯកឧត្តមទេសរដ្ឋមន្ត្រី បានថ្លែងអំណរគុណ និងស្នើផ្តល់អាទិភាពដល់ភាគីកម្ពុជាអោយបានទទួលកាន់តែច្រើនកាន់តែប្រសើរខណៈវិស័យអប់រំ គឺជាវិស័យចាំបាច់ ក្នុងចំណោមវិស័យអាទិភាពនានា ដែលរាជរដ្ឋាភិបាលកម្ពុជាបាននិងកំពុងយកចិត្តទុកដាក់បំផុត៕
